“Konstitusiya və Suverenlik İli” ilə əlaqədar könüllü gənclərin iştirakı ilə “Azərbaycan Konstitusiyası: Gənclərin hüquq və vəzifələri” mövzusunda dəyirmi masa təşkil olunub.

Naxçıvan Muxtar Respublikası Gənclər və İdman Nazirliyinin təşkilatçılığı ilə Yeni Azərbaycan Partiyası Naxçıvan Şəhər Təşkilatında reallaşan tədbirdə nazirliyin şöbə müdiri İlahə Haqverdiyeva Prezident İlham Əliyevin 28 dekabr 2024-cü il tarixli Sərəncamı ilə 2025-ci ilin Azərbaycan Respublikasında “Konstitusiya və Suverenlik İli” elan olunmasının önəmindən bəhs edib. Qeyd olunub ki, bu amil ölkəmizdə hüquqa, ədalətə verilən dəyərin göstəricisi olmaqla yanaşı, eyni zamanda suverenliyin tam bərpası ilə nəticələn tarixi zəfərlərimizin hüquq sistemindəki rolunu, əhəmiyyətini özündə ehtiva edir. 

Gənclər arasında hüquq mədəniyyəti və düşüncəsinin inkişaf etdirilməsi, hüquqi biliklərin artırılması məqsədi ilə keçirilən tədbirdə ekpert qismində çıxış edən Naxçıvan Muxtar Respublikası Ali Məhkəməsinin əməkdaşı Aygün Mirzəyeva mövzu ilə bağlı fikirlərini bölüşüb, hüquq və azadlıqlar barədə məlumatları diqqətə çatdırıb.  Mövzu ilə bağlı səmərəli müzakirələr aparılıb, gəncləri maraqlandıran suallar ekspert tərəfindən ətraflı şəkildə cavablandırılıb.

Əlavə edək ki, Gənclər və İdman Nazirliyinin tədbirlər planına əsasən “Konstitusiya və Suverenlik İli” ilə əlaqədar maarifləndirici və təbliğat xarakterli tədbirlər il boyu davam etdiriləcəkdir.